Concello de Ponteceso

CONCELLO DE PONTECESO

RSS

Concello :: Novas

Concello de Ponteceso e Xunta de Galicia coordinan esforzos para resolver os problemas creados pola contaminación da auga de Corme

O alcalde asegura que se acometerán as obras e as melloras tecnolóxicas necesarias para garantir a calidade do abastecemento

O Concello de Ponteceso continuará coa distribución de auga embotellada en Corme Porto á espera de que os esforzos que se están a facer, de maneira coordinada, tanto dende a administración local coma dende a autonómica permitan restablecer o subministro coas debidas garantías de seguridade para os seus usuarios e usuarias. “O Concello e a Xunta estamos colaborando de forma sincera, honesta e intensa para resolver o problema. Pedimos calma á poboación e que siga os consellos que se distribuíron a semana pasada”, sinalou o alcalde.

Lois García Carballido destacou que o Concello de Ponteceso porá todos os medios ao seu alcance para resolver non só a contaminación da auga, “senón que imos facer todas as obras, intervencións e melloras tecnolóxicas necesarias para que a auga de Corme sexa a mellor auga que exista, e non imos escatimar en medios nin en esforzos”. O alcalde insistiu na necesidade de manter a calma e tamén a confianza na administracións local, que traballa para garantir a potabilidade da auga, e na autonómica, que xestiona o problema de saúde.


Descargas asociadas


Concello de Ponteceso