ABERTO O PRAZO DE SOLICITUDE PARA O PROGRAMA "BENESTAR EN BALNEARIOS" 2026

Xa está aberto o prazo de solicitude para participar no programa "Benestar en balnearios" 2026, unha iniciativa que ofrece un total de 1.276 prazas para gozar de estancias de dez días e nove noites en establecementos termais da comunidade. Esta convocatoria procura fomentar o envellecemento activo, a autonomía persoal e a saúde das persoas maiores a través das propiedades terapéuticas das augas mineiromedicinais.

As quendas programadas desenvolveranse entre o 15 de xullo e o 31 de decembro do ano 2026. E para poder acceder a estas prazas, as persoas interesadas deben cumprir unha serie de requisitos fundamentais na data en que remate o prazo de presentación o 13 de xuño.

Esíxese ter cumpridos os 60 anos ou máis, aínda que a idade mínima baixa aos 55 anos no caso de ser pensionista do sistema da Seguridade Social por xubilación, invalidez, viuvez ou outras pensións. Así mesmo, é obrigatorio estar empadroado e residir nun concello galego, valerse por si mesmo para as actividades da vida diaria, non sufrir alteracións de comportamento que afecten a convivencia nin enfermidades transmisibles con risco de contaxio, e contar coa correspondente idoneidade médica para recibir tratamentos termais.

Cada estancia inclúe o aloxamento e a manutención en réxime de pensión completa en habitacións dobres de uso compartido, coa posibilidade de optar a unha habitación individual pagando un suplemento se o hotel dispón de vacantes. No ámbito sanitario, o programa cobre un recoñecemento médico inicial á chegada para prescribir as augas, o tratamento termal básico correspondente e un seguimento médico continuo. O paquete complétase cun programa de animación sociocultural organizado polo balneario e unha póliza colectiva de seguro turístico, mentres que os desprazamentos de ida e volta ao establecemento quedan fóra do programa e corren por conta de cada usuario.

As persoas interesadas poderán tramitar a súa solicitude ata o 26 de xuño. Os trámites pódense realizar preferentemente de forma electrónica a través do formulario oficial da sede electrónica da Xunta de Galicia (sede.xunta.gal) empregando sistemas coma Chave365 ou certificado dixital, ou ben de xeito presencial en calquera dos rexistros públicos habilitados pola administración.