O alcalde de Ponteceso, José Manuel Mato, asinou, esta mañá, un convenio de colaboración coa conselleira de Vivenda e Planificación de Infraestruturas, María Martínez Allegue, e coa directora xeral de Urbanismo, Encarnación Rivas, para a execución dunha senda peonil en Pazos. Trátase dunha intervención que o rexedor cualifica como "esencial para seguir reforzando a seguridade viaria na zona".
O acordo materializarase na construción dunha senda peonil na estrada AC-419, no treito que vai desde o punto quilométrico 2+990 ata o 3+350. Ademais da senda, habilitarase unha zona de aparcamento, dous pasos de peóns e reforzarase a sinalización existente. Segundo a previsión do organismo autonómico, que asumirá a licitación do contrato, as obras comezarían en setembro e poderían estar finalizadas a principios do 2026.
As actuacións en Pazos están encadradas dentro do Plan Hurbe, e levaranse a cabo cun investimento próximo aos 400.000 euros (397.250 euros). Da contía total, o organismo autonómico achegará o 70%, isto é, 278.074 euros. A cantidade restante, 119.174 euros, procederá das arcas municipais.
O primeiro edil agradeceu a predisposición da conselleira, da directora xeral de Urbanismo e de todo o persoal técnico, que amosaron a súa "completa colaboración para facer realidade esta demanda". O alcalde avanza que, proximamente, manterá un novo encontro coa conselleira na que se "porán enriba da mesa e se valorarán outros proxectos que consideramos importantes para continuar mellorando os servizos e infraestruturas da veciñanza".
BANDO
O alcalde do Concello de Ponteceso, José Manuel Mato Martínez
PARA ASEGURAR AS CASAS FRONTE Ó LUME, FAI SABER
A OBRIGA DE MANTER AS FINCAS LIMPAS ANTES DO 1 DE XUÑO SEGUNDO A LEI 3/2007 DE PREVENCIÓN E DEFENSA CONTRA INCENDIOS FORESTAIS DE GALICIA
En solo rústico:
Obriga de xestión (limpeza) e retirada de árbores (Piñeiros, eucaliptos, ...) nunha franxa e 50 metros, así como 15 metros para especies do Anexo I (Carballos, castiñeiros, ...) :
- Do límte de solo urbano, de núcleo rural ou urbanizable.
- Arredor de edificacións, vivendas illadas, urbanizacións, depósitos de lixo, cámpings, gasolineiras e parques e instalacións industriais situados a menos de 400 metros do monte ou de edificacións illadas en solo rústico a máis de 400 metros do monte.
Obriga de xestión (limpeza) e retirada de árbores (Piñeiros, eucaliptos, ...) nunha franxa e 2 metros así como 10 metros para especies do Anexo I (Carballos, castiñeiros, ...):
- Camiños.
En solo urbano, de núcleo rural ou urbanizable:
- Roza no caso de existencia de matogueiras.
- Poda e rareo do estrato arbóreo, impedindo a continuidade horizontal e vertical da vexetación.
Se as persoas responsables non realizasen os traballos de xestión da biomasa nos prazos fixados polo Concello para o cumprimento voluntario, este poderá levar adiante os mesmos, logo do previo apercibimento en forma e sen prexuízo da imposición, previo a tramitación do oportuno expediente, das sancións procedentes. Os custos derivados deses traballos serán repercutidos, se é o caso, ás persoas responsables, procedendo, de ser o caso, ao cobro dos gastos que se ocasionen ao Concello a través do procedemento de apremio.
Información máis detallada na oficina técnica do Concello (Servicio de Medio Ambiente)
Ponteceso a 08 maio de 2025
O alcalde, José Manuel Mato Martínez.