-
-
DEPARTAMENTOS
- Administración
- Servizos Sociais
- Emprego
- Cultura e Deportes
- Patrimonio
-
-
-
DATOS XERAIS
- Recursos
- Economía
- Demografía
-
Concello :: Novas
A Concellaría de Educación e a Casa-Museo Manuel María retoman as actividades do 50º aniversario de “Os soños na gaiola” coa exposición de 12 ilustracións de Leandro Lamas
Nas vindeiras semanas a mostra visitará os centros de primaria de Corme e Ponteceso para achegar ao alumnado a obra do autor chairego a través das coloristas acuarelas do pintor naronés
Tras a celebración dun espectáculo infantil de monicreques, protagonizado pola compañía de teatro Títeres Alakran o pasado mes de decembro, na Concellaría de Educación de Ponteceso retomamos as actividades conmemorativas do 50º aniversario da publicación do libro “Os soños na gaiola” de Manuel María, obra inaugural da poesía infantil en galego, cunha segunda proposta dirixida ao alumnado de primaria do noso concello.A nova actividade chegará da man do pintor e ilustrador naronés Leandro Lamas, que elaborou para a Fundación Manuel María de Estudos Galegos 12 ilustracións, en acuarela, baseadas en 12 poemas do libro (“O vento”, O meu barco”, “O arco da vella”, “A muiñeira”, “O soñador”, O lume novo”, “O meu año”, “Galiza”, “O meu burriño”, “Señor Gato”, “A estrela sen nome” e “O río”).
Co obxectivo de achegar a poesía de Manuel María á cativada dun xeito lúdico e divertido, o departamento que dirixe Carlos Penedo Casmartiño e a Fundación Manuel María levarán a cabo nas vindeiras catro semanas unha exposición coas ilustracións de Leandro Lamas no CEIP As Forcadas de Corme e, posteriormente, no centro Eduardo Pondal de Ponteceso.
A actividade consistirá na realización de visitas, de cincuenta minutos de duración, durante as que o alumnado de primaria poderá desfrutar da lectura dos poemas do autor chairego ao tempo que descobren as acuarelas repletas de cores, formas e perspectivas do pintor, que, sen dúbida, lograrán atraer a súa atención e interese dada a súa gran beleza. A través do xogo, procederase á observación e a análise das pinturas para percibir matices, detalles e escollas que nos leven a descubrir o mundo da infancia de Manuel María e relacionalo coa vida das nenas/os que visiten a exposición.
Máis actividades
Ademais, está previsto realizar un acto conxunto, aberto á participación das familias, no que o alumnado dará a coñecer os traballos didácticos desenvolvidos nas aulas durante o presente curso académico, a través dun recital poético e a interpretación musical dalgúns poemas.
Por último, o departamento que dirixe Carlos Penedo Casmartiño ten previsto realizar unha saída cultural a Outeiro de Rei (Lugo) para visitar a Casa-Museo de Manuel María coa finalidade de que os alumnos e alumnas de Ponteceso e Corme poidan coñecer o valioso e interesantísimo legado do escritor.
Agader convoca axudas destinadas á compra de maquinaria e equipamento para empresas que desenvolvan actividades non agrícolas
A partir do día 28, data prevista para a publicación da convocatoria, os/as interesados/as terán un mes de prazo para presentar as súas solicitudes
Todas as persoas que teñan unha empresa no rural e queiran ampliala ou modernizala poderán acollerse á nova convocatoria de axudas da Axencia Galega de Desenvolvemento Rural (AGADER) dirixida á “Ampliación e modernización de todo tipo de pequenas empresas que desenvolven actividades non agrarias”, dentro da medida 6.4 “Investimentos en actividades non agrarias” do PDR de Galicia 2014-2020. O prazo de presentación de solicitudes será de un mes a partir da data de publicación, prevista no DOG do vindeiro 28 de xaneiro.
As axudas, que ascenderán ao 45% dos gastos subvencionables, terán como beneficiarios a micro-empresas e pequenas empresas situadas na zona rural, persoas físicas suxeitas ao réxime especial de traballadores autónomos e titulares dunha explotación agraria ou membros da súa unidade familiar que diversifiquen as súas actividades en ámbitos non agrícolas e que desenvolvan o seu proxecto na propia explotación. Así mesmo, as subvencións concedidas irán destinadas á compra de maquinaria e equipamentos novos, afectos á actividade empresarial, e que sexan necesarios para desenvolvemento da actividade produtiva da empresa.
Para poder optar a este novo programa de axudas, os/as solicitantes deberán cumprir os seguintes requisitos:
- Empresas constituídas antes do 1 de setembro de 2018
- Os investimentos non poden estar iniciados na data de presentación de solicitude da axuda
- Que se desenvolvan no territorio de Galicia, agás nas parroquias clasificadas cono Zonas Densamente Poboadas (ZDP)
- O orzamento dos proxectos debe estar comprendido entre 10.000€ e 220.000€. No caso da artesanía, a contía, será de entre 5.000€ e 100.000€.
Proxectos subvencionables:
. Industrias, fábricas e locais destinados á produción de bens e materiais. Os investimentos relacionados coa utilización da madeira como materia prima ou fonte de enerxía limitaranse ás operacións de segunda transformación.
. Transformación e/ou comercialización de produtos agrarios, cando o produto final do proceso de transformación e/ou comercialización derivado dos investimentos non estea incluído no anexo I do Tratado de Funcionamento da Unión Europea (TFUE). Non obstante, para este sector de actividade excluiranse aqueles proxectos cun orzamento elixible superior a 60.000 €.
. Prestación de servizos en calquera sector económico, con exclusión das empresas de servizos de maquinaria agrícola e forestal e das empresas de servizos enerxéticos.
. Prestación de servizos sociais (garderías, coidado de anciáns, de persoas con discapacidade, granxas-escola...).
. Actividades de ocio, recreativas e deportivas.
. Artesanía e actividades artesanais.
. Actividades baseadas na innovación tecnolóxica e no comercio electrónico.
. Actividades nos sectores da enxeñaría, arquitectura, servizos técnicos, limpeza industrial e veterinaria.
. Comercio polo miúdo de produtos non incluídos no anexo I do TFUE.
Para máis información, os interesados/as poderán poñerse en contacto con Agader a través do enderezo electrónico infoagader@xunta.gal ou chamando aos teléfonos 981 547 382/ 981 547 369/ 981 542 690. Non deixes pasar esta oportunidade e permanece atento/a este mes de xaneiro ao DOG e/ou á páxina web de Agader.
.jpg "Boletín semanal da Rede Galega de Información Xuvenil 30 de xaneiro de 2017")
